Modric និយាយបែបនេះទៅ Messi ក្រោយទម្លាក់ក្រូអាតនៅ World Cup

2022-12-13 21:54:46
បាល់ទាត់

2022-12-13 21:54:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើ Luka Modric បាននិយាយសរសើរខ្សែប្រយុទ្ធ Lionel Messi មែនទែន ក្រោយពីគេបង្ហាញទម្រង់លេងល្អឥតខ្ចោះក្នុងការប្រកួតទល់ក្រុមក្រូអាតនៅវគ្គពាក់កណ្ដាលផ្ដាច់ព្រ័ត្រ FIFA World Cup 2022 យប់មិញនេះ។

អាហ្សង់ទីន ដែលមានកីឡាករ Messi ជាប្រធានក្រុមនោះបានយកឈ្នះលើក្រុមក្រូអាតក្នុងលទ្ធផលដល់ទៅ ៣-០ ឯណោះ។ ដោយ៣គ្រាប់នោះចេញពី Messi ១គ្រាប់និង Alvarez ២គ្រាប់។ ហើយនេះក៏ជាការប្រកួតសងសឹកបានសម្រេចរបស់អាហ្សង់ទីនផងដែរ ព្រោះកាលពី World Cup 2018 កន្លងទៅ ពួកគេលេងចាញ់ក្រុមក្រូអាតនេះក្នុងលទ្ធផល ៣-០ ដែរ។

ក្រោយពីចប់ការប្រកួតនៅយប់មិញនេះទៅ Modric មិនបានដាក់បន្ទុកទៅលើអាជ្ញាកណ្ដាលឬសមាជិកក្រុមណាម្នាក់នោះទេ។ ផ្ទុយទៅវិញ Legend របស់ក្រូអាតម្នាក់នេះ បាននិយាយសរសើរគូប្រកួតខ្លាំងៗទៅវិញ។ ខ្សែបម្រើលេងនៅក្លឹប Real Madrid បាននិយាយថា៖ “អបអរសាទរ និងជូនពរសំណាងល្អនៅប្រកួតផ្ដាច់ព្រ័ត្របន្ទាប់។ ខ្ញុំសង្ឃឹមថា Messi នឹងឈ្នះ World Cup ជាមួយក្រុមអាហ្សង់ទីន ព្រោះគាត់សក្ដិសមនឹងវា។ Messi ជាកីឡាករល្អបំផុតក្នុងប្រវត្តិសាស្ត្រ ហើយគាត់បានបង្ហាញសមត្ថភាពរបស់គាត់ក្នុងព្រឹត្តិការណ៍នេះហើយ”។

សូម្បីតែគ្រូបង្វឹកក្រូអាត លោក Zlatko Dalic ក៏និយាយស្រដៀង Modric ដែរថា៖ “មិនចាំបាច់និយាយច្រើនពី Messi នោះទេ។ គាត់ជាកីឡាករល្អបំផុតនៅលើលោកនេះ ពិតជាល្អ និងគ្រោះថ្នាក់ខ្លាំងណាស់នៅថ្ងៃនេះ។ នេះជា Messi ដែលយើងចង់ឃើញ។ Messi ដែលអាចបង្កើតអ្វីគ្រប់យ៉ាងនៅលើទីលាន”៕

អត្ថបទ៖ ប្រុស យុទ្ធ