ពានយុវជនអន្តរក្រសួង-ស្ថាប័ន នឹងចាប់ផ្ដើមនៅថ្ងៃទី ២៤ខែធ្នូខាងមុខនេះហើយ

2022-12-19 01:09:46
បាល់ទាត់

2022-12-19 01:09:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតពានរង្វាន់កីឡាបាល់ទាត់ មិត្តភាពយុវជនអន្តរក្រសួង-ស្ថាប័ន លើកទី៨ ឆ្នាំ២០២២ ដែលរៀបចំឡើងដោយសហភាពសហព័ន្ធយុវជនកម្ពុជា (ស.ស.យ.ក) នឹងចាប់ផ្ដើមប្រកួតពីថ្ងៃទី២៤ខែធ្នូឆ្នាំ២០២២ខាងមុខនេះតទៅហើយ។

ឯកឧត្តម សុខ សប្បាយណា ប្រធានគណ:កម្មធិការរបស់ពានរង្វាន់ខាងលើបាននិយាយក្នុងថ្ងៃសន្នីសីទកាសែតថា ដោយសារតែកូវីដ១៩ រយៈពេល២ឆ្នាំហើយដែលខកខានរៀបចំពានរង្វាន់នេះឡើង។ យ៉ាងណាមិញនៅឆ្នាំ២០២២នេះ ក្រោយពីធូរស្បើយពីកូវីដ១៩ហើយ ទើបសហភាពសហព័ន្ធយុវជនកម្ពុជា (ស.ស.យ.ក) បានសម្រេចរៀបចំពានអន្ដរក្រសួងនេះឡើងវិញ។ ដោយវាស្ថិតក្រោមស្មារតីលេងកីឡាដើម្បីសុខភាព ពង្រឹងកិច្ចសហប្រតិបត្តិការរវាងយុវជននៅតាមក្រសួង និងស្ថាប័នរដ្ឋនានាទាំងអស់។ មួយវិញក្នុងការប្រកួតនៅឆ្នាំនេះដែរ នឹងមានការប្លែងជាងរាល់ឆ្នាំ ដោយអ្នករៀបចំការប្រកួតនឹងតម្រូវឱ្យលេងតាមស្ដង់ដារតែម្ដង ពោលគឺ១១នាក់ទល់នឹង១១នាក់។

ដោយឡែកឯកឧត្តម ស សុខា អនុប្រធានសហភាពសហព័ន្ធយុវជនកម្ពុជាបាននិយាយដែរថា៖ “ការរៀបចំការប្រកួតការដណ្តើមពានរង្វាន់មិត្តភាពយុវជនអន្តរក្រសួង-ស្ថាប័ន ធ្វើយ៉ាណាដើម្បីឲ្យ មន្ត្រីរាជការមកពីបណ្តាក្រសួងស្ថាប័ននានាចូលរួមប្រកួតដើម្បីមិត្តភាព សុខភាព សហការគ្នា ស្រលាញ់គ្នាដូចជាគ្រួសារតែមួយ។ ខណៈដែលនេះក៏ជាស្មារតីមួយជួយឱ្យគ្រប់គ្នាលេងកីឡានៅថ្ងៃសម្រាក សៅ អាទិត្យផងដែរ”។

ពានរង្វាន់យុវជនអន្ដរក្រសួងនៅឆ្នាំនេះ មានក្រុមចូលរួមសរុបដល់ទៅ៣០ក្រុមឯណោះ និងកីឡាករចូលរួមជាង៧០០នាក់។ ការប្រកួតនឹងត្រូវបែងចែកជាពូល ហើយប្រកួតគ្នាសន្សំពីថ្ងៃទី ២៤ខែធ្នូឆ្នាំ២០២២នេះ រហូតដល់ថ្ងៃទី ១៩ខែមីនាឆ្នាំ២០២៣ខាងមុខ៕