ISI Community Cup បញ្ចប់ដោយភាពសប្បាយរីករាយ ដោយមានក្មេងៗចូលរួមយ៉ាងច្រើន

2022-08-21 20:08:33
បាល់ទាត់

2022-08-21 20:08:33
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីប្រកួតបាល់ទាត់ ISI Community Cup កាលពីម្សិលមិញនៅទីលាន KMH Park បានបញ្ចប់ទៅដោយភាពសប្បាយរីករាយ ដោយមានក្មេងៗចូលរួមយ៉ាងច្រើនកុះករ។

លោក សៀក សុវណ្ណ អគ្គលេខាធិការក្លឹបបាល់ទាត់ អាយ អេស អាយ ដង្កោសែនជ័យបានលើកឡើងក្នុងកម្មវិធីនោះថា លោកពិតជាសប្បាយចិត្ត ក្រោយមានការចូលរួមគាំទ្រយ៉ាងច្រើនបែបនេះ។ លោកក៏បានបញ្ជាក់ទៅកាន់ក្មេងៗដែលបានចូលរួមទាំងអស់ថា រាល់ថ្ងៃសៅរ៍ វេលាម៉ោង ៥ ដល់ម៉ោង ៩ យប់ក្មេងៗអាចមកលេងបាល់នៅតារាង KHM Park ដោយមិនគិតលុយ ហើយរាល់ថ្ងៃសៅរ៍នេះក្រុមការងារបានដាក់ឈ្មោះថា «សហគមន៍ ISI »។

លោកសង្ឃឹមថា ក្រោយការបង្កើតកម្មវិធីនេះឡើងក្មេងៗនឹងស្រលាញ់វិស័យបាល់ទាត់កាន់តែខ្លាំង ពិសេសចូលរួមគាំទ្រដល់ក្រុម អាយ អេស អាយ ដង្កោសែនជ័យ ដើម្បីលើកទឹកចិត្តក្រុមមួយនេះឲ្យបានឡើងទៅកាន់លីគកំពូលកម្ពុជា។ ជាងនេះទៅទៀតលោកជឿថា ក្រោមការរៀបចំព្រឹត្តិការណ៍បែបនេះក្មេងៗ ដែលចូលរួមនៅពេលនេះ ដល់ពេលធំឡើងនឹងអាចចូលរួមលេងឲ្យក្លឹប ISI ទាំងអស់គ្នា។ បច្ចុប្បន្ន ISI នៅសល់៦ប្រកួតទៀត នឹងបញ្ចប់លីគទី២ ហើយលោកសង្ឃឹមយ៉ាងមុតមាំថា ក្រុមមួយនេះនឹងអាចឡើងទៅកាន់ លីគកំពូលកម្ពុជា១០០%។

ជាចុងក្រោយលោកក៏សូមអរគុណអ្នកដែលបានចូលរួមកម្មវិធីដណ្តើមពានកុមារកាលពីម្សិលមិញ ដែរមានភាពសប្បាយរីករាយយ៉ាងខ្លាំង ដូច្នេះបើសិនប្រិយមិត្តចូលចិត្តនឹងចង់គាំទ្រ «សហគមន៍ ISI DANGKOR SENCHEY FC » សូមចូលរួមចែករំលែករូបនេះទៅកាន់បងប្អូន, ពួកម៉ាក់, ក្រុមការងារ និង មិត្តរួមថ្នាក់ តាមរយៈមធ្យោបាយផ្សេងៗ ឬចូលទៅកាន់ប្រូហ្វាល់ Facebook, Instagram, Telegram។ ដើម្បីអោយគ្រប់គ្នាបានស្កែន និងបានចូលរួមសប្បាយៗ ជាមួយគ្នា។

ការប្រកួតមានបែងចែកទៅតាមកម្រិតអាយុគឺ U6 ៤ក្រុម U10 ៤ក្រុម U12 ៤ក្រុម និង U14 ៤ក្រុម។ ក្នុងថ្ងៃនោះដែរក៏មានបង្ហាញពីការជួសជុលទីលាន KMH Park របស់ក្លឹបបាល់ទាត់ អាយ អេស អាយ ដង្កោជ័យ ដោយកែលម្អ ឡើងវិញនៅដើមឆ្នាំ២០២២នេះ ដើម្បីឲ្យស្របទៅនឹង លក្ខន្តិកៈរបស់ក្រុមហ៊ុន Cambodian Premier League។

ក្រុមមានមូលដ្ឋាននៅសង្កាត់ចោមចៅមួយនេះត្រូវបានបង្កើតឡើងក្នុងឆ្នាំ២០១៦ និងបានចូលរួមការប្រកួត ក្របខណ្ឌ Cambodian League 2 ដំបូងក្នុងរដូវកាល២០២០។ ក្រោយដំណើរការស្ថាបនាឡើងវិញ កីឡដ្ឋាន KMH Park នឹងមានហេដ្ឋារចនាសម្ព័ន្ធកាន់តែសម្បូរបែប ហើយអាចផ្ទុកទស្សនិកជន ៣០០០នាក់៕