Lingard បដិសេធនឹងសម្ដី Rangnick ដែលថា គេសុំឈប់ប្រកួតលើកនេះ ដើម្បីសម្រាកអារម្មណ៍ឲ្យស្រស់ស្រាយ

2022-02-04 04:24:39
បាល់ទាត់

2022-02-04 04:24:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើ Jesse Lingard បានធ្វើបង្ហោះសារនៅលើបណ្ដាញសង្គមខ្លួននៅក្នុងថ្ងៃនេះ បដិសេធនឹងសម្ដីរបស់ លោក Ralf Rangnick អ្នកចាត់ការបណ្ដោះអាសន្នរបស់ក្លឹប Manchester United ដែលថា គេសុំឈប់ប្រកួតលើកនេះ ដើម្បីសម្រាកអារម្មណ៍ឲ្យស្រស់ស្រាយ។

ដើមហេតុ ដែលបង្កឲ្យកើតរឿងនេះគឺ កាលពីថ្ងៃម្សិលមិញនេះ លោក Rangnick បាននិយាយនៅក្នុងសន្និសីទកាសែតពីអវត្តមានរបស់ Lingard នៅក្នុងប្រកួត FA Cup តទល់នឹង Middlesbrough នៅថ្ងៃស្អែកនេះ (ម៉ោងកម្ពុជា) គឺដោយសារ ខ្សែបម្រើរូបនេះ បានសុំឈប់ក្នុងសប្ដាហ៍នេះ ដើម្បីសម្រាកអារម្មណ៍ឲ្យបានស្រស់ស្រាយឡើងវិញ ដោយរំពឹងថានឹងមកហ្វឹកហាត់ធម្មតាវិញនៅថ្ងៃច័ន្ទ។

យ៉ាងណានៅក្នុងថ្ងៃនេះស្រាប់តែ Lingard ក៏បានចេញសារបដិសេធនឹងអ្វី ដែលលោក Rangnick បានលើកឡើង ដោយថា៖" ខាងក្លឹបជាអ្នកឲ្យយោបល់ឲ្យគេឈប់ទេដោយសារតែមានរឿងផ្ទាល់ខ្លួនអញ្ចឹង។ និយាយទៅខួរក្បាលខ្ញុំស្រស់ស្រាយរួចទៅហើយ។ ខ្ញុំធ្វើអ្វីក៏ដោយតែងតែជាលក្ខណៈអាជីពត្រឹមត្រូវណាស់ ឲ្យតែហៅលេង គឺខ្ញុំនឹងប្រឹងឲ្យអស់ ១០០% នៅក្នុងការប្រកួតនោះរហូតមក "។

បើតាមការចុះផ្សាយរបស់ Dailymail ខ្សែបម្រើ Lingard ហាក់ដូចជាមានបញ្ហាជាមួយក្លឹប ក្រោយគេចង់ចាកចេញពីក្លឹបនេះនៅក្នុងខែមករា កន្លងទៅនេះ តែត្រូវបានបរាជ័យក្រោយ Mason Greenwood បាបជាប់សង្ស័យនឹងរឿងប្រើអំពើហឹង្សា និងគំរាមសម្លាប់សង្សារ ដែលត្រូវបានព្យួរឈ្មោះពីក្លឹបជាបណ្ដោះអាសន្នសិន៕

ប្រភព៖ Dailymail ប្រែសម្រួល៖ ហ៊ីម រស្មី